អំពីការបើកសម្ភោធជាផ្លូវកា
សរសេរដោយchhimchhouden | November 24, 2023 . 1 year ago
កម្មវិធីអប់រំឌីជីថលដល់យុវជនជនជាតិដើមភាគតិចកួយបានបើកសម្ភោធជាផ្លូវការនៅថ្ងៃទី១៧ ឧសភា ឆ្នាំ២០២៣ នៅមជ្ឈមណ្ឌលភូមិអាស៊ី ស្ថិតនៅក្រុងស្ទឹងសែន ខេត្តកំពង់ធំ។ កម្មវិធីបានប្រព្រឹត្តិទៅយ៉ាងអធឹកអធមដោយមានវត្តមានចូលរួមពី មន្ទីរអប់រំ មន្ទីរវប្បធម៌ សហព័ន្ធសហភាពយុវជនខេត្តកំពង់ធំ អាជ្ញាធម៌មូលដ្ឋានភូមិ ឃុំ ស្រុក ព្រមទាំងយុវជន និងសិល្បករសហគមន៍មកពីតំបន់ផ្សេងៗគ្នា ដែលភាគច្រើនមកពីសហគមន៍ជនជាតិដើមភាគតិចកួយ បានចូលរួមយ៉ាងច្រើនកុះករកម្មវិធីសម្ភោធន៍នេះប្រមាណ ១៥០នាក់។ គម្រោងអប់រំអក្ខរកម្មឌីជីថលសម្រាប់ យុវជនជនជាតិដើមភាគតិច កួយ មានគោលបំណងចង់ឃើញយុវជនជនជាតិដើមភាគតិចកួយ និងសមាជិកក្នុងសហគមន៍ អាចប្រើប្រាស់ជំនាញឌីជីថលជាមួយនឹងការយល់ដឹងពីសុវត្ថិភាពអ៊ីនធើណេតសម្រាប់ការងារប្រចាំថ្ងៃ ដើម្បីកែលម្អលទ្ធភាពទទួលបានព័ត៌មាន លើកកម្ពស់ជីវភាពរស់នៅ និងអភិរក្សអត្តសញ្ញាណវប្បធម៌របស់សហគមន៍។ គម្រោងនេះមានគោលបំណង និងលើកកម្ពស់សកម្មភាពសហគមន៍សេដ្ឋកិច្ចសហគមន៍ដូចជា ផលិតផល និងសេវាកម្មដើម្បីអភិវឌ្ឍសហគមន៍ជនជាតិដើមភាគតិចកួយ។ លើសពីការបង្ហាញអំពីគម្រោង យុវជនសិល្បៈសហគមន៍ជនជាតិដើមភាគតិច ក៏បានសម្ដែងរបាំបង្កបង្កើនផល ជារបាំដែលទើបតម្លើងថ្មីដោយយុវជនក្នុងភូមិអណ្ដាស ភ្ញៀវកិត្តិយស និងគណធិបតីបានទស្សនា និងមានការកោតសរសើរជាខ្លាំងអំពី ភាពច្នៃប្រឌិត និងសកម្មភាពការពារ ថែរក្សាវប្បធម៌របស់ប្រជាសហគមន៍ជនជាតិដើមភាគតិតកួយ។ លោក ហិន សោភ័ណ្ឌប្រធានមន្ទីរវប្បធម៌ខេត្តកំពង់ធំ ដែលបានចូលរួមក្នុងកម្មវិធីបានថ្លែងពីចំណាប់អារម្មណ៍យ៉ាងខ្លាំងចំពោះកម្មវិធីអប់រំឌីជីថលដល់យុវជនជនជាតិដើមភាគតិចកួយ និងបានបន្ថែមពីសារៈសំខាន់នៃវិស័យឌីជីថល ក្នុងការចូលរួមថែរក្សា ការពារ អភិរក្ស អត្តសញ្ញាណ វប្បធម៌របស់ជនជាតិដើមភាគតិច ពេលដែលយើងនិយាយអំពីកិច្ចការពារវប្បធម៌ អត្តសញ្ញាណ យើងមិនអាចបំភ្លេចបច្ចេកវិទ្យាដែល ជាឧបករណ៍ដ៏សំខាន់សំរាប់បំពេញកិច្ចការនេះបានទេ។ លើសពីអ្វីដែលរំពឹងទុក លោកសាស្ត្រាចារ្យជប៉ុន Masaru Kataoka នៃមណ្ឌលភូមិអាស៊ី សម្រេចចិត្តក្នុងការចូលរួមជ្រោមជ្រែង និងអភិវឌ្ឍន៍សហគមន៍ទៅលើគម្រោង៣បន្ថែមទៀតគឺ ១- គម្រោងតម្លើងស្នាដៃសិល្បៈសហគមន៍ជនជាតិដើម ២- គម្រោងអភិវឌ្ឍន៍ផ្ទះស្នាក់សហគមន៍ និងសហការណ៍លើវិស័យទេសចរណ៍ក្នុងសហគមន៍ ៣- គម្រោងអភិវឌ្ឍន៍សេដ្ឋកិច្ចសហគមន៍តាមរយៈការវិនិយោគលើវិស័យកសិកម្មដល់ប្រជាកសិករ។ ក្នុងឱកាសនេះ គ្រប់ភាគីពាក់ព័ន្ធនៃគម្រោង ទាំងភូមិអាស៊ី អង្គការស៊ីយ៉ា មន្ទីរអប់រំ មន្ទីរវប្បធម៌ សហគមន៍ បានជួបពិភាក្សាគ្នា និងរៀនសូត្រពីគ្នាដោយផ្ទាល់ ដែលជាចំណុចដ៏ល្អមួយក្នុងការបង្កើតទំនាក់ទំនង និងការយល់គ្នាកាន់តែច្រើនបន្ថែមទៀត។
