ចាប់ផ្ដើមថ្នាក់រៀនដំបូង

---

ក្នុងដើមខែវិច្ឆិកានេះ ថ្នាក់បង្រៀនបណ្តុះបណ្ដាលឌីជីថលបានចាប់ផ្ដើមហើយ ដោយចាប់ផ្ដើមពីមូលដ្ឋាននៃការប្រើប្រាស់កុំព្យូទ័រ​ ដូចជាការបិតបើក កុំព្យូទ័រឲ្យបានត្រឹមត្រូវ និងការអនុវត្តន៍ក្ដារចុច (Keyboard)។ ភាគច្រើននៃយុវជនរបស់យើង ពុំទាន់មានបទពិសោធន៍ ក្នុងការប្រើប្រាស់កុំព្យូទ័រនៅឡើយ មានភាគតិចប៉ុណ្ណោះដែលធ្លាប់បានសិក្សាក្រៅម៉ោង (រៀនបំប៉ន)។ ការចេះប្រើប្រាស់ឧបករណ៍ឌីជីថលដូចជាម៉ាស៊ីនកុំព្យូទ័រ ជារឿងចាំបាច់មួយដើម្បីឈានទៅកាន់ការប្រើប្រាស់កម្មវិធីផ្សេងៗដែលជាតម្រូវការសម្រាប់កិច្ចការសិក្សា ការស្វែងរកពត៌មាន ការផ្សព្វផ្សាយផ្សេងៗជាដើម។ គម្រោងអប់រំឌីជីថលសម្រាប់យុវជនជនជាតិដើមភាគ នឹងបើកបង្រៀន៣ថ្ងៃ​ គឺ ថ្ងៃព្រហស្បតិ៍​ ២ថ្នាក់ ម៉ោង ១៣:00 ដល់ម៉ោង ១៧:០០ល្ងាច ថ្ងៃសៅរ៍ សម្រាប់ ៣ថ្នាក់ ម៉ោង ០៨:០០ ដល់ម៉ោង​ ១០:០០ព្រឹក និងម៉ោង​ ១៣:00 ដល់ម៉ោង ១៧:០០ល្ងាច ថ្ងៃអាទិត្យ សម្រាប់៣ថ្នាក់ម៉ោង ០៨:០០ ដល់ម៉ោង​ ១០:០០ព្រឹក និងម៉ោង​ ១៣:00 ដល់ម៉ោង ១៧:០០ល្ងាច ដោយបែងចែកសិស្សជាពីរ ក្រុមធំៗគឺ ក្រុមសិស្សវិទ្យាល័យ ដែលនឹងត្រូវរៀនទូរទៅ អំពីមូលដ្ឋានគ្រឹះនៃកុំព្យូទ័រ ក្រុមសហគមន៍ ដែលនឹងត្រូវរៀនសូត្រតាមតម្រូវការជាក់លាក់ ដូចជាកម្មវិធី Excel សម្រាប់កិច្ចការចងក្រងសហគមន៍ កិច្ចការសន្សំប្រាក់ និងជំនាញទីផ្សារឌីជីថលសម្រាប់ជួយផ្សព្វផ្សាយ សហគមន៍ ផលិតផលសហគមន៍ជាដើម។ វិធីសាស្ត្រនៃការអនុវត្តន៍ គម្រោងអប់រំអក្ខរកម្មឌីជីថលសម្រាប់ យវជនជនជាតិដើមភាគតិចកួយ ផ្តោទលើការអនុវត្ត។ ជំហានដំបូងគម្រោងនេះ នឹងត្រូវអនុវត្តន៍ក្នុងរយៈពេល ១២ខែ ដែលគោលដៅរបស់យើងធ្វើការទៅលើភូមិចំនួន៥ភូមិ (ភូមិត្រឡែកចាស់ ភូមិស្រែ ភូមិគគី ភូមិត្រឡែកថ្មី និងភូមិអណ្ដាស) ដែលស្ថិតក្នុងឃុំសាលាវិស័យ។ ក្រុមការងាររំពឹងថា ក្នុងដំណើរការអនុវត្តន៍គម្រោងជំហានទី១នេះ នឹងអាចបណ្ដុះបណ្ដាលគ្រូបង្គោលឌីជីថលសហគមន៍ចំនួន១០រូបសម្រាប់ បន្តដំណើរការអប់រំឌីជីថលដល់សហគមន៍បន្តទៀតក្នុងជំហានទី២។ ក្នុងរយៈពេល១២ខែ នេះផងដែរ ក្រុមការងារនឹងបង្កើតបណ្ណាល័យអេឡិចត្រូនិក ឬបណ្ណាល័យឌីជីថលមួយ ដែលអ្នកទាំងអស់គ្នា អាចស្វែងរកពត៌មាន រៀនសូត្រអំពីជនជាតិដើមភាគតិចកួយ ដូចជា ប្រវត្តិសាស្ត្រដែលទាក់ទងនឹងជនជាតិដើមភាគតិច របាំ ម្ហូបអាហារ ចំណេះដឹង និងជំនាញបែបប្រពៃណីដ៏សម្បូបែបផ្សេងទៀតជាច្រើន។ ក្រុមការងារភូមិអាស៊ី និងអ្នកបច្ចេកទេសនៃបណ្ដាញភូមិអាស៊ី ដែលមាន៨ប្រទេស រួមមាន កម្ពុជា ជប៉ុន ឥណ្ឌូនេស៊ី ហ្វីលីពីន ឥណ្ឌា នេប៉ាល់ មីយ៉ាន់ម៉ា និងស្រីលង្កា នឹងបន្តជួយជ្រុំជ្រែងយុវជនសហគមន៍ជនជាតិដើម ដើម្បីបញ្ចូលពត៌មានចូលទៅក្នុងបណ្ណាល័យឌីជីថលរបស់ពួកគាត់។