សកម្មភាពតម្លើងកុំព្យូទ័រក្នុងសហគមន៍

---

កុំព្យូទ័រ១១ គ្រឿងជាបឋមត្រូវបានជួសជុលរួចរាល់ នឹងបានយកមកតម្លើងនៅក្នុងមជ្ឈមណ្ឌលបណ្ដុះបណ្ដាលឌីជីថលក្នុងភូមិគគីរ។ កុំព្យូទ័រទាំងនេះបានមកពី ការបរិច្ចាកពីសប្បុរសជនគ្រប់ទិសទី ទាំងក្នុងប្រទេស ទាំងក្រៅប្រទេស ជាពិសេសពីប្រទេសជប៉ុន។ យើងទទួលបានកុំព្យូទ័រ២៣ គ្រឿង ក្រោមយុទ្ធនាការប្រមូលកុំព្យូរទ័រចាស់ៗដែលធ្វើឡើងពីរដង តាមរយៈយុទ្ធនាការផ្សព្វផ្សាយតាមឌីជីថល។ កិច្ចការជួសជុលចំណាយពេលវេលាយូរ និងច្រើនដំណាក់កាល ពីព្រោះកុំព្យូទ័រខ្លះមិនអាចជួសជុលបានទាំងស្រុង កុំព្យូទ័រខ្លះអាចដោះយកគ្រឿងបង្គុំមកប្រើប្រាស់បាន ហើយជាលទ្ធផល កុំព្យូទ័រ១១គ្រឿងបានជួសជុលរួចរាល់ជាស្ថាពរ និងបានតម្លើងក្នុងសហគមន៍ដើម្បីចាប់ផ្ដើមសកម្មភាពបង្រៀន និងអនុវត្ត ហើយកុំព្យូរទ័រជាបន្តបន្ទាប់នឹងត្រូវជួសជុលយោងទៅតាមស្ថានភាពជាក់ស្តែង ដែលយើងរំពឹងថាឲ្យបាន១៥គ្រឿងសម្រាប់កម្មវិធីបង្រៀននេះ។ គម្រោងអប់រំអក្ខរកម្មឌីជីថលសម្រាប់ យវជនជនជាតិដើមភាគតិច កួយ មានគោលបំណងចង់ឃើញយុវជនជនជាតិដើមភាគតិច គួយ និងសមាជិកក្នុងសហគមន៍ អាចប្រើប្រាស់ជំនាញឌីជីថលជាមួយនឹងការយល់ដឹងពីសុវត្ថិភាពអ៊ីនធើណេតសម្រាប់ការងារប្រចាំថ្ងៃ ដើម្បីកែលម្អលទ្ធភាពទទួលបានព័ត៌មាន លើកកម្ពស់ជីវភាពរស់នៅ និងអភិរក្សអត្តសញ្ញាណវប្បធម៌របស់សហគមន៍។ គម្រោងនេះមានគោលបំណង និងលើកកម្ពស់សកម្មភាពសហគមន៍សេដ្ឋកិច្ចសហគមន៍ដូចជា ផលិតផល និងសេវាកម្មដើម្បីអភិវឌ្ឍសហគមន៍ជនជាតិដើមភាគតិចកួយ។ បច្ចុប្បន្នសិស្សប្រមាណ៨០នាក់ ដែលភាគច្រើនជាសិស្សវិទ្យាល័យ និងយុវជនក្នុងសហគមន៍ដែលបានឈប់ពីការសិក្សា​មកពីភូមិ៥ (ភូមិគគីរ ភូមិស្រែ ភូមិអណ្ដាស ភូមិត្រឡែក ភូមិអូរក្រូច) បានចុះឈ្មោះចូលរៀនវគ្គបណ្ដុះបណ្ដាលដែលមានរយៈពេល១ឆ្នាំនេះ ហើយកម្មវិធីបណ្ដុះបណ្ដាលជំនាញ ឌីជីថលនេះរំពឹងថា យុវជនជនជាតិដើមភាគតិចកួយក្នុងសហគមន៍១០រូប នឹងមានសម្ថភាពក្លាយជាគ្រូបង្គោលក្នុងសហគមន៍ ដើម្បីបង្រៀនបន្តទៅកាន់ភូមិទាំង៥នេះ បន្ទាប់ពីបញ្ចប់គម្រោងរយៈពេល១ឆ្នាំ។